ridernewshd 
مریم اورنگزیب نے کہا ہے کہ 9 مئی والی ذہنیت ملک کو ترقی سے روکتی ہے۔ یہ اب پارلیمان پر حملہ آور ہیں۔
پارلیمنٹ ہاؤس کے باہر میڈیا بریفنگ میں مریم اورنگزیب نے کہا کہ آج 9 مئی والوں نے پارلیمان کے اندر پارلیمان پر حملہ کیا۔انہوں نے کہا کہ یہ جتنی بدتمیزی اور ہنگامہ آرائی کرلیں، ہم اپنا کام جاری رکھیں گے۔ شہباز شریف نے جو وژن دیا اسے مکمل کریں گے۔ن لیگی ترجمان نے مزید کہا کہ یہ روتے اور چیخیں مارتے رہیں گے، شہباز شریف کے آنے سے ان کو تکلیف ہے کہ بےروزگاری اور مہنگائی ختم نہ ہوجائے۔اُن کا کہنا تھا کہ 2013 میں سیاسی اور معاشی استحکام آرہا تھا، تب بھی انہوں نے ایسا کیا۔ 2018 میں آر ٹی ایس بٹھا کر نواز شریف کا مینڈیٹ چوری کیا گیا۔
مریم اورنگزیب نے یہ بھی کہا کہ 2013 والے نہ بدلے اور نہ بدلنے والے ہیں۔ 9 مئی والی ذہنیت ملک کی ترقی کو روکتی ہے۔انہوں نے کہا کہ پوچھتی ہوں کہ پورے پاکستان میں کیا تمام سیٹیں پی ٹی آئی نے جیتنی تھی؟ یہ لوگ الیکشن کمیشن میں ثبوت جمع کیوں نہیں کرواتے؟ن لیگی ترجمان نے کہا کہ 2018 میں جہاں ترقی کا سفر چھوڑا وہاں سے شروع کریں گے۔ یہ لوگ اسی طرح روتے اور کھڑے رہیں گے۔
اُن کا کہنا تھا کہ چینی صدر کے دورے کے موقع پر دھرنے دیے گئے، انہوں نے ہنگامہ آرائی کرنی ہے، انتشار پسند لوگ ہیں، انہوں نے اپنے دور میں ملک کو صرف لوٹا ہے۔
مریم اورنگزیب نے کہا کہ ملک کے نوجوانوں کو انہوں نے صرف بدتہذیبی سکھائی ہے، پنجاب کے اندر وزیراعلیٰ مریم نواز گالم گلوچ کے بعد بھی اپوزیشن کے پاس گئیں۔
انہوں نے کہا کہ شہباز شریف کا بطور وزیر اعظم انتخاب خوش آئند ہے، تمام اتحادیوں کا کہنا ہے سب ن لیگ کی مدد کریں گے، وفاقی کابینہ سے متعلق ابھی مشاورت جاری ہے۔
ن لیگی ترجمان نے کہا کہ پنجاب کے اندر بھی کابینہ سے متعلق مشاورت جاری ہے، اتنا بتا سکتی ہوں کہ بہت اچھا گورننس کا ماڈل ملے گا۔
ان کا کہنا تھا کہ آج 9 مئی والے پھر پارلیمان میں پہنچ گئے ہیں، ان کو تکلیف ہے ملک کہیں ترقی نہ کر جائے۔ شہباز شریف نے پہلے بھی پاکستان کو ڈیفالٹ ہونے سے بچایا۔مریم اورنگزیب نے کہا کہ پہلے بھی اپنی سیاست کو داؤ پر لگا کر ملک کو سری لنکا بننے سے بچایا، ملک کی ٹرانسپورٹ، سڑکیں، بجلی کے منصوبوں پر پنجاب میں انتھک محنت کی۔
انہوں نے کہا کہ آج پھر وزیراعظم کے منصب پر شہباز شریف جیسے لیڈر کا انتخاب ہوا ہے، پارلیمان کے اندر تمام اتحادیوں نے ن لیگ کو ووٹ دیا۔ن لیگی ترجمان نے کہا کہ یہی وزیراعظم کی طاقت ہوتی ہے کہ اکثریت ووٹ کرے، پاکستان جب بھی سیاسی استحکام کی طرف جا رہا ہو ایک جتھہ نقصان پہنچانے آ جاتا ہے۔ان کا کہنا تھا کہ 2013 میں بھی گالم گلوچ اور سپریم کورٹ کے باہر گندے کپڑے لٹکا دیے گئے، 2018 میں آر ٹی ایس بٹھا کر ملک پر مسلط ہو گئے۔
مریم اورنگزیب نے کہا کہ اپنے دور حکومت میں تمام منصوبوں کو بدترین دہانے پر پہنچا دیا۔ پہلے سرکاری ٹی وی اور اداروں پر حملہ کیا، آج پارلیمنٹ کے اندر حملہ آور ہوئے۔انہوں نے کہا کہ اپوزیشن لیڈر کو ساتھ مل کر چلنے کی دعوت دی، پہلے بہانہ تھا مجھے دھاندلی سے نکالا گیا، اب 9 مئی جیسے واقعات سے چھپنے کی کوشش کی جا رہی ہے۔
About The Author
