ridernewshd 
چیئرمین پیپلزپارٹی بلاول بھٹو زرداری نے کہا ہے عالمی قوانین کے مطابق پاکستان کو بھارتی جارحیت کا جواب دینے کا پورا حق حاصل ہے۔
ترک میڈیا کو انٹرویو دیتے ہوئے بلاول بھٹو زرداری نے کہا کہ یہ ایک عالمی مسئلہ ہے عالمی طاقتوں کو تنازع کے حل کے لیے مداخلت کرنی ہوگی۔ بھارت کو اس کے اقدامات کے لیے جوابدہ کیا جانا چاہیے تاکہ بھارت ہوش کے ناخن لے۔ غیر جانبدار تحقیقات سے ہم ایسا میکنزم بنانا چاہتے ہیں جو مستقبل میں ایسے دہشت گرد حملوں کو روک سکے۔
دوسری جانب عرب میڈیا کو انٹرویو میں چیئرمین پیپلزپارٹی نے یہ بھی کہا کہ عالمی قوانین کے تحت پاکستان کو بھارتی جارحیت کا جواب دینے کا پورا حق حاصل ہے۔ بھارت نے عالمی قوانین کے خلاف ورزی کرتے ہوئے پاکستان کی خودمختاری کے خلاف اشتعال انگیز اقدامات کیے ہیں۔
انہوں نے کہا کہ بھارت اپنے جرائم کے لیے اور بے گناہ شہریوں کے قتل عام کو چھپانے کے لیے دہشتگرد کیمپوں کا جھوٹ بول رہا ہے۔
انہوں نے سوال کرتے ہوئے کہا کہ اگر پاکستان میں دہشتگرد کیمپ ہیں تو بھارت نے بین الاقوامی تحقیقات کے پاکستانی مطالبے کو کیوں رد کیا؟ بھارت نے شہری آبادی، شہری تنصیبات اور ڈیموں کو نشانہ بنایا۔
About The Author
