توہینِ الیکشن کمیشن، جیل ٹرائل، بانیٔ پی ٹی آئی کی ترمیمی درخواست کی دستاویزات طلب
ridernewshd
1 min read
لاہور ہائی کورٹ نے بانیٔ پی ٹی آئی کی توہینِ الیکشن کمیشن کیس میں جیل ٹرائل کے خلاف درخواست پر سماعت کرتے ہوئے ترمیمی درخواست کی دستاویزات آئندہ سماعت پر طلب کر لیں۔
جسٹس عالیہ نیلم کی سربراہی میں 3 رکنی بینچ نے درخواست پر سماعت کی۔
عدالت نے درخواست گزار کے وکیل سے کہا کہ آپ کو ترمیم کے ساتھ درخواست دائر کرنے کا کہا تھا۔
بانیٔ پی ٹی آئی کے وکیل نے جواب دیا کہ میں نے ترمیم شدہ درخواست 10 جنوری کو دائر کر دی تھی۔
جسٹس عالیہ نیلم نے کہا کہ آپ کو متفرق درخواست دائر کرنی چاہیے تھی، بینچ کے ممبران کے پاس ترمیمی درخواست کی کاپیاں موجود نہیں۔
بانیٔ پی ٹی آئی کے وکیل نے استدعا کی کہ 24 جنوری کو جیل میں ٹرائل فکس ہے، اس سے قبل فردِ جرم بھی عائد ہو چکی، عدالت اس درخواست میں حکمِ امتناع جاری کر دے۔
عدالتِ عالیہ نے کہا کہ کاپیاں ہمارے پاس موجود نہیں ہیں، ٹرائل کو چلنے دیں۔
اس کے ساتھ ہی لاہور ہائی کورٹ نے مزید سماعت پیر تک ملتوی کر دی
About The Author
